KISAH OBOR PASKAH

Samua orang pung Kisah... samua orang pung  kenangan, karena manusia adalah manusia kenangan, manusia yang jadi deng kenangan. Sakarang walaupun seng pake masin waktu beta mau bale ke masa lalu cuma dengan kenangan waktu kacil dalam perayaan paskah Teringat antara taong1995-1997 saat perayaan paskah di Hulaliu beta SMP, persiapan paskah mulai dar potong bulu, bukan di Aring mar di waihatu abis potong biasa katong cari buah rau, buah yang jarang jarang orang jual akang dan buah itu beta Cuma making kang di Hulaliu saja. Kalo su potong abis turun ka negri (kuru eke Hurariu) la mulai biking kang model-model ada tamang-tamang pung yang su parongko deng sagala model,,..amper siang waktu lonceng lalu bakumpul di muka Gareja Betlehem, katong pawai… manyanyi.. beta inga ada satu pengasuh pegang rotang .. katong pawai sampe lubang ITANG IDONG… abis pawai katong iko ibadah paskah di dalam gareja, waktu itu simpan obor di jiku gareja, masuk ibadah mar pikirang tarus jang orang ambe obor.. kalo ibadah kubur terbuka di kintal gareja seng pikiran sebab ibadah polo-polo obor…. Abis ibadah…. Seng pake rekeng satu dua tiga lai,,,,langsung huuuurtttttt….lari di waelang iko-iko rame saja.. tamang-tamang bilng katong pi cari doriang, mar seng pernah dapa… hehe kenangan ni e… Pernah abis pawai naik ka gunung Ahihai seng tahu par apa,,, Cuma par lia negeri diwaktu bulan tarang sisa… barmaeng sampe matahari naik dapa di Ahihai.. pulang rumah siang itu satu hari antero sono seng bangong bangong.. Cuma bangong par makan saja…. Akang pung malam masih deng obor itu jua turun di pante la pi cari malaten deng tapis-tapis santan.. pokoknya barmaeng obor sampe laste minyak abis… sumbu tamasu dan berakhir sudah kisah kehidupan obor itu. Itu saat SMP saat su bisa potong obor sandiri.. Lebe jau ka masa lalu lai.. waktu kalas 1 atau 2 SD bagitu,,, b inga samar-samar… kalo orang lewat deng parang pi hotu mama bilang “kalo potong bulu.. mon pung saruas jua e…” lalu sore lai be su pung obor… malam itu masih tempo-tempo lai… obor su manyala par barmaeng ka… tes tes ka.. seng tau lai blom tahu hati bai bai,,, pokoknya su bakar kamuka.. hehehe.. Amper siang lonceng babunyi mama kasih bangong.. pernah be seng bangong.. pagi hari be manangis… tapi su lewat e… tunggu paskah taong muka… rekeng-rekeng tidor barapa kali lai la bangong baru paskah e… kalo be bangong be seng ka gareja.. be tunggu di starat dara di muka kintal saja deng muka manganto.... kalo pasukan pawai langgar be cuma badiri di muka rumah saja pegang-pegang obor ..…kalo su abis be nananti putaran berikut… ngang-nganga ka sektor ampa ka dong su tembus di muka gareja ka balaong.. kalo su seng lewat muka rumah lai berarti su abis pawai lalu masuk lanjut sono kombali masih dalam ingatang… Pernah seng ada obor,… mama taruh lilin di batang papaya lalu beta badiri di muka rumah lia pasukan pawai langgar dan beta paleng sanang. samua karna mama pung sayang.. samua Cuma karna mau sambut Kebangkitan Kristus.. samua karna Tuhan pung sayang Salamat paskah tamang-tamang dolo panggayo sama-sama.. sakarang su balabuh jauh jauh…… salamat paskah basudara di negeri.. sakarang beta su di negeri orang..… SALAMAT PASKAH MAMA tarang obor di muka rumah kini su tarang di muka pastori special untuk isteri tercinta Ince Siahaya salamat paskah sayang.. beta inga katong salalo sama sama kalo paskah ipphar.. .. Hiay, 27 Maret 2016, sesaat setelah selesai pawai beta tulis ini disela-sela periapan ibadah paskah jam 9 pagi.

Tidak ada komentar:

Kemegahan Terakhir